ایران امریکا تنازع، پاکستان محتاط، مجوزہ منصوبوں پر خاموشی برقرار

اسلام آباد ( ترکیہ خبر) پاکستان نے ایران اور امریکا کے درمیان جاری کشیدگی کے خاتمے سے متعلق زیر گردش منصوبوں پر محتاط مؤقف اختیار کرتے ہوئے تصدیق یا تردید سے گریز کیا ہے۔دفتر خارجہ کے ترجمان نے کہا کہ مختلف نوعیت کی تجاویز اور جنگ بندی سے متعلق خبریں سامنے آ رہی ہیں، تاہم انفرادی رپورٹس پر تبصرہ نہیں کیا جا سکتا، البتہ یہ واضح ہے کہ امن کے لیے سفارتی کوششیں جاری ہیں۔دوسری جانب ایرانی حکام نے بیرونی دباؤ کو مسترد کرتے ہوئے کہا ہے کہ وہ کسی بھی غیرمنطقی تجویز کو قبول نہیں کریں گے اور اپنے مفادات کے مطابق فیصلے کریں گے۔ایرانی ترجمان کے مطابق مختلف ممالک کے ذریعے پیش کیے گئے بعض منصوبے قابل قبول نہیں، تاہم بات چیت کو کمزوری نہیں سمجھا جاتا اور ایران اپنا مؤقف بھرپور انداز میں پیش کرتا رہے گا۔تجزیہ کاروں کے مطابق اس وقت سفارتی سطح پر سرگرمیاں جاری ہیں، تاہم حتمی پیش رفت کے لیے مزید وقت درکار ہو سکتا ہے جبکہ خطے کی صورتحال بدستور حساس ہے۔