انطالیہ ڈپلومیسی فورم میں فلسطین کے تعلیمی نظام کی بحالی پر اہم پینل، عالمی شخصیات کی شرکت

 باکو( ترکیہ خبر) انطالیہ ڈپلومیسی فورم کے موقع پر 18 اپریل کو ایک اہم پینل اجلاس منعقد ہوا جس کا عنوان تھا “فلسطین میں امن کے لیے اتحاد: تعلیمی نظام کی تباہی کا سامنا اور مستقبل کا تحفظ”۔آذربائیجان کی سرکاری خبر رساں ایجنسی AZERTAC کے مطابق اس تقریب میں آذربائیجان کی فرسٹ نائب صدر مہربان علییوا اور ان کی صاحبزادی لیلیٰ علییوا نے بھی شرکت کی۔تقریب کے آغاز سے قبل شرکاء نے افریقی کلچر ہاؤس کے اسٹال کا دورہ کیا، جہاں افریقی خواتین کے دستکاری کے کام کو فروغ دینے اور اسے معاشی مواقع میں تبدیل کرنے کے اقدامات سے متعلق آگاہی دی گئی۔ یہ ادارہ 2016 میں ترکیہ کی خاتونِ اول امینہ اردوان کی پہل پر قائم کیا گیا تھا۔پینل کا آغاز فلسطین سے متعلق ایک دستاویزی فلم کی نمائش سے کیا گیا، جس میں جنگ سے متاثرہ علاقوں میں تعلیمی نظام کو پہنچنے والے نقصانات کو اجاگر کیا گیا۔مقررین نے اپنے خطابات میں زور دیا کہ جنگ سے متاثرہ بچوں کے لیے محفوظ تعلیمی ماحول کی بحالی، معاونتی نظام کی مضبوطی اور تعلیمی تسلسل کو یقینی بنانا خطے کے مستقبل کے لیے انتہائی اہم ہے۔امینہ اردوان نے اپنے خطاب میں کہا کہ اس تقریب کے پیغامات دنیا بھر میں جنگ سے متاثرہ بچوں کے لیے امید کی ایک کرن ہیں۔ انہوں نے کہا کہ بچے اور نوجوان کسی بھی معاشرے کا مستقبل ہیں، اور تشدد کو فروغ دینے والے عناصر کے خلاف مؤثر اقدامات ناگزیر ہیں۔بعد ازاں شرکاء نے یادگاری تصاویر بنوائیں اور فلسطین میں تعلیمی نظام کی تباہی سے متعلق خصوصی نمائش کا بھی دورہ کیا۔