ترک صدر کی بلقانی ممالک کے وزرائے خارجہ سے ملاقات، دوطرفہ تعلقات پر تبادلہ خیال

استنبول( ترکیہ خبر) ترک صدر رجب طیب ایردوان نے بلقانی ممالک کے وزرائے خارجہ کے ساتھ اجلاس میں دوطرفہ تعلقات اور علاقائی مسائل پر تبادلہ خیال کیا۔اجلاس میں مونٹیگرو، کوسوو، بوسنیا و ہرزیگووینا، شمالی مقدونیہ، البانیہ اور سربیا کے وزرائے خارجہ شریک ہوئے۔ ایردوان نے سرحدی سکیورٹی، توانائی، ٹیکنالوجی اور نقل و حمل جیسے امور کے حل اور خطے کے مفادات کے لیے مشاورت کی اہمیت پر زور دیا۔صدر ایردوان نے کہا کہ دنیا اور خطہ مختلف چیلنجز کا سامنا کر رہے ہیں، اس لیے بلقان پیس پلیٹ فارم کے رکن ممالک کے درمیان یکجہتی اور باہمی سمجھ بوجھ ضروری ہے۔ انہوں نے ماضی کے زخموں سے سبق سیکھنے اور خطے میں عدم استحکام کے اثرات کم کرنے کے لیے مل کر کام کرنے کی اہمیت بھی بیان کی۔ایردوان نے کہا کہ قیامِ امن کے اقدامات مختلف خطوں، خاص طور پر یوکرین، غزہ اور شام میں جاری ہیں۔ اجلاس میں وزیرِ خارجہ حاقان فیدان، ایردوان کے چیف مشیر عاکف چاعتائے کلچ اور دیگر حکام بھی موجود تھے۔