یورپی یونین کا آرمینیا اور ترکی کے درمیان ریلوے رابطے کی بحالی کے اقدامات کا خیرمقدم

برسلز( ترکیہ خبر) یورپی یونین نے آرمینیا اور ترکی کے درمیان ریلوے رابطے کی بحالی کے لیے ہونے والی حالیہ پیش رفت کا خیرمقدم کیا ہے۔یورپی یونین کی خارجہ پالیسی سربراہ کاجا کالاس کے دفتر کے مطابق دونوں ممالک کے درمیان ایک مشترکہ ورکنگ گروپ کا اجلاس ترکی کے شمال مشرقی شہر کارس میں منعقد ہوا، جس میں ریلوے رابطے کی بحالی پر پیش رفت کا جائزہ لیا گیا۔بیان میں کہا گیا ہے کہ آرمینیا اور ترکی کے درمیان تعلقات کی بہتری کا عمل خطے میں مثبت رجحانات کو ظاہر کرتا ہے، جو دیرپا امن اور استحکام کے لیے ضروری ہے۔ یورپی یونین نے دونوں ممالک کے درمیان مکمل سفارتی و عملی تعلقات کی بحالی کی بھی حوصلہ افزائی کی ہے۔یورپی یونین کے مطابق کارس-گیومری ریلوے لائن فعال ہونے کی صورت میں خطے میں رابطوں کو فروغ ملے گا اور جنوبی قفقاز کے عوام کو براہ راست معاشی فوائد حاصل ہوں گے۔بیان میں مزید کہا گیا کہ یورپی یونین خطے میں رابطہ کاری کو فروغ دینے کے لیے اپنی عالمی گیٹ وے حکمت عملی اور ٹرانس کیسپین ٹرانسپورٹ کوریڈور کے تحت کوششیں جاری رکھے ہوئے ہے، جس میں آرمینیا اور ترکی کو اہم شراکت دار قرار دیا گیا ہے۔