برسلز میں لاپتا آذربائیجانیوں کے اہلِ خانہ کی یورپی یونین حکام سے ملاقات

باکو ( تر کیہ خبر) برسلز میں یورپی یونین کی یورپی خارجہ امور سروس کے عہدیداروں نے 21 اکتوبر کو ’’لاپتا افراد کے اہلِ خانہ، قاراباغ‘‘ نامی عوامی تنظیم کے ارکان سے ملاقات کی، جس میں تنازع کے بعد لاپتا ہونے والے آذربائیجانی شہریوں کے بارے میں معلومات کی عدم فراہمی کا معاملہ اٹھایا گیا۔آذربائیجان کی سرکاری خبر رساں ایجنسی آذرتاج کے مطابق ملاقات میں یورپی یونین کے جنوبی قفقاز اور جارجیا کے بحران سے متعلق خصوصی نمائندے کے سیاسی مشیر اوکے باؤمان اور آذربائیجان سے رابطوں کے رابطہ کار مارکو کاردینالی شریک ہوئے۔ لاپتا افراد کے اہلِ خانہ نے بتایا کہ تنازع ختم ہونے کے بعد بھی آرمینیا نے ان کے پیاروں کے بارے میں کوئی معلومات فراہم نہیں کیں۔تنظیم کی سربراہ کونول بہبودووا نے بتایا کہ آذربائیجانی لاپتا افراد کے لواحقین نے 20 اکتوبر کو برسلز میں یورپی پارلیمان کے سامنے لکسمبرگ اسکوائر پر احتجاجی مظاہرہ کیا اور ایک اعلامیہ بھی منظور کیا۔انہوں نے زور دیا کہ لاپتا آذربائیجانیوں کے انجام سے متعلق آرمینیا براہِ راست ذمہ داری رکھتا ہے اور اسے اجتماعی قبروں کے مقامات کے بارے میں معلومات آذربائیجان کے ساتھ شیئر کرنی چاہییں۔کونول بہبودووا کے مطابق اب تک آذربائیجان کے ان علاقوں میں، جو قبضے سے آزاد کرائے گئے، 32 اجتماعی قبریں دریافت ہو چکی ہیں۔ انہوں نے ان دریافتوں کو ایک بڑے انسانی المیے کا محض ایک چھوٹا سا حصہ قرار دیا۔