ہر کانگریس AK پارٹی کی نئی شروعات کی علامت ہے:صدر ایردوان

انقرہ( مانیٹرنگ ڈیسک) صدر رجب طیب ایردوان نے اے کے پارٹی کے صوبائی چیئرمین اجلاس سے خطاب کرتے ہوئے کہا ہے کہ جماعت کی ہر کانگریس ایک نئی شروعات کی علامت ہے۔ اس اجلاس میں صوبائی صدور، خواتین اور نوجوان گروپس کے نمائندگان اور بلدیاتی سربراہان نے شرکت کی۔صدر ایردوان نے کہا کہ قوم کی خدمت سے وابستگی وقت کے ساتھ مزید مضبوط ہو رہی ہے اور 14 اگست 2001 کو جماعت کے قیام کے بعد سے ہر کانگریس AK پارٹی کے سیاسی سفر میں ایک اہم مرحلہ رہی ہے۔ انہوں نے مزید کہا کہ آٹھویں عظیم کانگریس نے پارٹی کو مزید مستحکم کیا ہے اور آنے والا دور جماعت اور اس کے اتحاد کے لیے نئے عروج کا باعث ہوگا۔اپوزیشن جماعتوں کو مخاطب کرتے ہوئے ایردوان نے کہا کہ جو جماعتیں بغیر اختلاف کے اپنی کانگریس منعقد کرنے کی صلاحیت نہیں رکھتیں، ان کی بے چینی فطری ہے۔ انہوں نے واضح کیا کہ AK پارٹی اصلاحات اور عوامی خدمت پر توجہ مرکوز رکھے ہوئے ہے، جبکہ مخالف جماعتیں اندرونی اختلافات کا شکار ہیں۔صدر ایردوان نے بتایا کہ کانگریس کے دوران پارٹی نے اپنا احتساب کیا، عوام کی تنقید سنی اور ایمانداری کے ساتھ اندرونی جائزہ لیا۔ مرکزی انتظامی کمیٹی کو نئے اور تجربہ کار رہنماں کے ساتھ مزید مضبوط کیا گیا تاکہ نئی توانائی اور تجربہ ایک ساتھ آگے بڑھے۔انہوں نے زور دیا کہ AK پارٹی میں کسی کو نکالا نہیں جاتا بلکہ جماعت کو مزید مضبوط بنایا جاتا ہے، اور پارٹی ملک کے مسائل کے حل کے مرکز کے طور پر عوامی خدمت کے مشن کو پوری قوت کے ساتھ جاری رکھے گی۔