ڈی-8 سیکرٹری جنرل سہیل محمود نے استنبول میں اسٹریٹجک کمیونیکیشن سمٹ میں اعلیٰ سطحی اجلاس کاانعقاد

استنبول ( ترکیہ خبر)استنبول میں منعقدہ انٹرنیشنل اسٹریٹجک کمیونیکیشن سمٹ 2026 میں شرکت کے دوران، ڈی-8 آرگنائزیشن برائے اقتصادی تعاون کے سیکرٹری جنرل سہیل محمود نے متعدد اعلیٰ سطحی ملاقاتیں کیں۔ ڈی-8 آرگنائزیشن کے بیان کے مطابق، محمود نے 27-28 مارچ کو ترکی کی کمیونیکیشن ڈائریکٹوریٹ کی جانب سے منعقدہ سمٹ میں حصہ لیا۔سمٹ کے دوران، محمود نے مختلف پینلز میں شرکت کی اور ترکی کے کمیونیکیشن ڈائریکٹر برہان الدین دوران سے ملاقات کی۔ ملاقات میں محمود نے عالمی چیلنجز سے نمٹنے کے لیے سمٹ میں کی جانے والی بات چیت کی اہمیت پر زور دیا۔انہوں نے یہ بھی کہا کہ ڈی-8 آرگنائزیشن اور کمیونیکیشن ڈائریکٹوریٹ کو اسٹریٹجک کمیونیکیشن اور پبلک ڈپلومیسی کے شعبوں میں تعاون کو بڑھانے کے طریقے تلاش کرنے چاہئیں۔اس کے علاوہ، محمود نے بنگلہ دیش کے وزیر اطلاعات و نشریات ظہیر الدین سپون سے ملاقات کی اور ڈی-8 رکن ممالک کے درمیان میڈیا تعاون مضبوط کرنے پر تبادلہ خیال کیا۔ملاقات کے دوران، محمود نے اس بات پر زور دیا کہ میڈیا کا کردار آرگنائزیشن کی مقبولیت اور عالمی و علاقائی رسائی بڑھانے میں نہایت اہم ہے۔