باکو کا سخت ردعمل، یورپی قراردادوں پر سفیروں کی طلبی، علاقائی تنازع میں کشیدگی میں اضافہ

باکو( ترکیہ خبر) آذربائیجان نے بیلجیم اور نیدرلینڈز کی پارلیمانوں کی جانب سے منظور کردہ قراردادوں پر سخت احتجاج ریکارڈ کراتے ہوئے دونوں ممالک کے سفیروں کو وزارتِ خارجہ میں طلب کر لیا ہے۔آذربائیجان کی وزارتِ خارجہ کے مطابق یہ احتجاج 20 اپریل کو کیا گیا، جس میں بیلجیم کے سفیر جولین ڈی فریپونٹ اور نیدرلینڈز کی سفیر ماریانے ڈی یونگ کو علیحدہ علیحدہ طلب کیا گیا۔آذربائیجان نے مؤقف اختیار کیا کہ 16 اپریل کو منظور کی گئی قراردادیں اس کی خودمختاری اور علاقائی سالمیت کے خلاف ہیں اور یہ اقدامات خطے میں جاری امن عمل کو نقصان پہنچا سکتے ہیں۔وزارتِ خارجہ کے بیان میں کہا گیا کہ ان قراردادوں میں شامل دعوے بین الاقوامی قانون کی سنگین خلاف ورزی ہیں اور ریاستی امور میں مداخلت کے مترادف ہیں۔باکو نے مزید کہا کہ آذربائیجان اور آرمینیا کے درمیان جاری امن مذاکرات کے دوران اس نوعیت کے اقدامات مثبت پیش رفت کو متاثر کر سکتے ہیں۔بیان میں دونوں یورپی ممالک سے مطالبہ کیا گیا کہ وہ اپنی پارلیمانوں میں ایسے عناصر کے خلاف اقدامات کریں جو دوطرفہ تعلقات کو نقصان پہنچا رہے ہیں۔