واشنگٹن میں آذربائیجان کے سفیر کی امریکی طلبہ سے ملاقات

 باکو( تر کیہ خبر) امریکہ میں آذربائیجان کے سفارت خانے میں سفیر خضر ابراہیم نے جارج واشنگٹن یونیورسٹی کی بین الاقوامی طلبہ انجمن کے ارکان سے ملاقات کی۔آذربائیجان کی سرکاری خبر رساں ایجنسی کے مطابق ملاقات کے دوران طلبہ کو آذربائیجان کی خارجہ پالیسی کی اہم ترجیحات، آذربائیجان اور امریکہ کے درمیان تزویراتی شراکت داری کی موجودہ صورت حال اور مستقبل کے امکانات، ملک کے تاریخی و ثقافتی ورثے اور آذربائیجان میں تعلیم کے مواقع کے بارے میں تفصیلی معلومات فراہم کی گئیں۔سفیر نے امریکہ کے نمایاں اعلیٰ تعلیمی اداروں میں شامل جارج واشنگٹن یونیورسٹی میں زیر تعلیم نوجوانوں کی آذربائیجان میں دلچسپی کو سراہا۔انہوں نے کہا کہ اس نوعیت کی ملاقاتیں طلبہ کے آذربائیجان سے متعلق علم میں اضافے، آذربائیجانی قوم کی تاریخ، ثقافت اور جدید ترقی سے آگاہی اور مستقبل میں آذربائیجان و امریکہ کے درمیان تعلیمی، ثقافتی اور عوامی روابط کو مزید فروغ دینے میں معاون ثابت ہوں گی۔