آذربائیجان کے آزاد گاؤں میں 242 مکانات اور جدید سہولتوں کا افتتاح

 باکو ( تر کیہ خبر) آذربائیجان کے صدر الہام علییف اور خاتون اول مہربان علییوا نےضلع زنگیلان کے گاؤں جہانگیر بیگلی میں تعمیر نو کے پہلے مرحلے کا افتتاح کیا۔یہ گاؤں 1993 میں آرمینیائی افواج کے قبضے میں چلا گیا تھا۔ اس وقت یہاں اسکول، بچوں کا باغ، ثقافتی مرکز اور مواصلاتی دفتر موجود تھے، جبکہ مقامی آبادی ریشم سازی، گندم کی کاشت، انگور کی پیداوار اور مویشی پالنے سے وابستہ تھی۔ آذربائیجان کی مسلح افواج نے 21 اکتوبر 2020 کو اس علاقے کو آزاد کرایا تھا، جبکہ صدر الہام علییف نے مئی 2023 میں تعمیر نو کا سنگ بنیاد رکھا تھا۔آذربائیجان خبر رساں ادارے کے مطابق 179.5 ہیکٹر رقبے پر پھیلے اس گاؤں کے پہلے مرحلے میں 62.57 ہیکٹر زمین پر 242 رہائشی مکانات تعمیر کیے گئے ہیں۔ اس کے علاوہ اسکول، بچوں کی نگہداشت کا مرکز، دو منزلہ انتظامی عمارت، بازار اور کثیرالمقاصد عمارت بھی تیار کی گئی ہے۔مکانات 2، 3، 4 اور 5 کمروں پر مشتمل ہیں اور تمام گھروں کو پانی، بجلی، گیس، شمسی توانائی کے پینلز اور تیز رفتار انٹرنیٹ کی سہولت فراہم کی گئی ہے۔ گاؤں کی اندرونی سڑکیں بھی پختہ کر دی گئی ہیں۔کثیرالمقاصد عمارت میں طبی مرکز، دواخانہ، دکان، درزی کی دکان اور بیوٹی پارلر بھی قائم کیے جائیں گے، جہاں مقامی رہائشیوں کو روزمرہ زندگی کی بنیادی سہولتیں میسر آئیں گی۔