ترکیہ کا مشرقی بحیرہ روم میں فرانسیسی جہاز کی غیر قانونی سرگرمیوں پر احتجاج

استنبول (ترکیہ خبر) ترکیہ نے الزام عائد کیا ہے کہ فرانس کے پرچم بردار ایک بحری جہاز نے مشرقی بحیرہ روم میں اس کی سمندری حدود کے اندر غیر مجاز سائنسی تحقیق کرنے کا منصوبہ بنایا ہے، جبکہ اس مقصد کے لیے ضروری اجازت کا عمل ابھی مکمل نہیں ہوا۔ترک وزارت خارجہ نے اپنے تحریری بیان میں کہا کہ مذکورہ جہاز ترکیہ کے براعظمی سمندری خطے میں زیر سمندر مواصلاتی تاریں بچھانے سے متعلق غیر قانونی سائنسی سرگرمیاں انجام دینا چاہتا ہے۔ ان سمندری حدود کی تفصیلات ترکیہ نے 18 مارچ 2020 کو اقوام متحدہ کو فراہم کی تھیں۔وزارت خارجہ کے مطابق اس منصوبے کے سلسلے میں یونان اور یونانی قبرصی انتظامیہ کی جانب سے جاری کردہ غیر مجاز بحری انتباہات منسوخ کر دیے گئے ہیں۔بیان میں واضح کیا گیا کہ بین الاقوامی بحری قانون کے مسلمہ اصولوں کے تحت ترکیہ کی اجازت حاصل کرنا ضروری ہے، تاہم منصوبے کے اس حصے کے لیے تاحال منظوری کا عمل مکمل نہیں کیا گیا جو ترکیہ کی براعظمی حدود میں آتا ہے۔ترک وزارت خارجہ نے کہا کہ ترکیہ بین الاقوامی قانون کے تحت اپنے خودمختار حقوق کے تحفظ کے لیے پوری طرح پرعزم ہے، جبکہ خطے میں تعاون، مذاکرات اور باہمی رابطوں پر مبنی حکمت عملی بھی جاری رکھے گا۔