امریکا، آذربائیجان اور آرمینیا کا ٹرمپ راہداری منصوبے پر عملی کام شروع کرنے کا فیصلہ

 باکو ( تر کیہ خبر) امریکا، آذربائیجان اور آرمینیا نے ٹرمپ راہداری منصوبے پر پیش رفت تیز کرنے کے لیے سہ فریقی تکنیکی منصوبہ بندی گروپوں کی سرگرمیوں کا آغاز کر دیا ہے۔امریکی محکمہ خارجہ کے مطابق تینوں ممالک کی حکومتوں نے 6 نومبر کو جاری مشترکہ اعلامیے میں اس پیش رفت کی تصدیق کی۔اعلامیے کے مطابق امریکی نائب وزیر خارجہ برائے یورپی و یوریشیائی امور برینڈن ہنراہن، آرمینیا کے نائب وزیر خارجہ واہان کوستانیان اور آذربائیجان کے نائب وزیر خارجہ النور محمدوف نے منصوبے پر مشترکہ تکنیکی کام شروع کرنے کا افتتاح کیا۔مشترکہ اعلامیے میں کہا گیا کہ اس فورم کے ذریعے تینوں ممالک کے پالیسی ساز حکام اور تکنیکی ماہرین ایک پلیٹ فارم پر جمع ہوں گے، تاکہ خطے میں دیرپا امن و استحکام، معاشی سرگرمیوں میں اضافے، علاقائی روابط کی بہتری اور تجارتی خوشحالی کے لیے مشترکہ کوششیں کی جا سکیں۔اعلامیے میں مزید کہا گیا کہ یہ تعاون 8 اگست 2025 کو امریکی صدر ڈونلڈ ٹرمپ کی ثالثی میں طے پانے والے تاریخی امن سربراہی اجلاس کے اعلامیے کی اہمیت کو بھی اجاگر کرتا ہے۔