معاہدۂ صدی کے تحت آذربائیجان میں 4.6 ارب بیرل تیل نکالا گیا،بختیار اسلان

باکو( تر کیہ خبر) نومبر 1997 میں پہلے کنویں سے پیداوار شروع ہونے سے رواں سال یکم جولائی تک ’’معاہدۂ صدی‘‘ کے تحت 4.6 ارب بیرل سے زائد خام تیل نکالا جا چکا ہے۔یہ بات بی پی کے بحیرۂ کیسپین، وسطی ایشیا اور ترکی کے خطے میں ابلاغ اور بیرونی تعلقات کے نائب صدر بختیار اسلان بیلی نے آذرتاج کو انٹرویو دیتے ہوئے بتائی۔انہوں نے کہا کہ اس عرصے کے دوران تقریباً 63 ارب مکعب میٹر ’’آذری، چراغ، گنیشلی‘‘ منصوبے سے حاصل ہونے والی متعلقہ گیس آذربائیجان کی حکومت کے حوالے کی گئی۔بختیار اسلان بیلی کے مطابق اس منصوبے کی ایک اہم خصوصیت یہ تھی کہ تیل کے ساتھ نکلنے والی متعلقہ گیس کو تجارتی گیس تصور نہیں کیا گیا بلکہ معاہدے میں اسے مکمل طور پر آذربائیجان کی ریاست کے حوالے کرنے کی شرط شامل تھی۔انہوں نے کہا کہ اسی انتظام کے نتیجے میں 63 ارب مکعب میٹر گیس آذربائیجان کے حوالے کی جاچکی ہے، جو حجم کے اعتبار سے ایک الگ بڑے گیس منصوبے سے حاصل ہونے والے ذخائر کے برابر ہے۔