انطالیہ ڈپلومیسی فورم میں صدر اردوان کی مصروف سفارت کاری، عالمی رہنماؤں سے اہم ملاقاتیں

انطالیہ( تر کیہ خبر)ترکیہ کے صدارتی شعبہ اطلاعات نے کہا ہے کہ صدر رجب طیب اردوان نے انطالیہ ڈپلومیسی فورم کے دوران عالمی رہنماؤں کے ساتھ دوطرفہ تعلقات، علاقائی بحرانوں اور بین الاقوامی تعاون پر تفصیلی مذاکرات کیے۔ترک سوشل میڈیا پلیٹ فارم “این سوسیل” پر جاری بیان میں صدارتی کمیونیکیشن ڈائریکٹر برہان الدین دوران نے کہا کہ صدر اردوان نے فورم کے موقع پر انتہائی مصروف سفارتی سرگرمیاں انجام دیں۔انہوں نے بتایا کہ ان ملاقاتوں میں تجارت، انفراسٹرکچر، دفاعی صنعت، توانائی اور اسٹریٹجک تعاون جیسے اہم شعبوں پر تفصیلی گفتگو ہوئی۔بیان کے مطابق علاقائی اور عالمی امور بھی زیر بحث آئے جن میں غزہ کی انسانی صورتحال، اسرائیلی حملے، اور ایران، امریکا اور اسرائیل کے درمیان جنگ بندی سے متعلق پیش رفت شامل تھی۔برہان الدین دوران نے کہا کہ صدر اردوان نے اپنی تقاریر اور ملاقاتوں میں عالمی امن، علاقائی استحکام اور تعاون کے فروغ پر زور دیا۔ان کے مطابق انطالیہ ڈپلومیسی فورم نے ایک بار پھر ترکیہ کے فعال سفارتی کردار کو اجاگر کیا ہے اور انطالیہ کو بین الاقوامی سفارت کاری کا اہم مرکز قرار دیا جا رہا ہے۔