قطر پر حملہ ظاہر کرتا ہے کہ اسرائیل جنگ ختم کرنے میں دلچسپی نہیں رکھتا: ترکیہ

ترکیہ…ترکیہ نے اسرائیل کی جانب سے قطر کے دارالحکومت دوحا میں حملے کی شدید مذمت کی ہے اور کہا ہے کہ اس اقدام سے واضح ہوتا ہے کہ اسرائیل جنگ بندی کے کسی بھی معاہدے میں دلچسپی نہیں رکھتا۔ترک وزارت خارجہ کی جانب سے جاری کردہ بیان میں کہا گیا ہے کہ ایسے وقت میں جب جنگ بندی کے لیے مذاکرات جاری ہیں، حماس کے مذاکراتی وفد کو نشانہ بنانا اس بات کا ثبوت ہے کہ اسرائیل کا مقصد امن قائم کرنا نہیں بلکہ جنگ کو مزید طول دینا ہے۔وزارت خارجہ نے مزید کہا کہ اسرائیل نے اپنی توسیع پسندانہ پالیسیوں اور دہشت گردی کو ریاستی حکمتِ عملی بنا لیا ہے، جو کہ خطے کے لیے انتہائی خطرناک ہے۔یاد رہے کہ آج اسرائیلی فورسز نے دوحا میں حماس کے دفتر کو بمباری کا نشانہ بنایا۔عرب میڈیا کے مطابق حملے کے وقت دفتر میں حماس کے پانچ اہم رہنما موجود تھے، جن میں خالد مشعل، خلیل الحیہ، زاہر جبارین، محمد درویش، اور ابو مرزوق شامل ہیں۔