عالمی فیشن لیجنڈ جارجیو ارمانی کا 91 سال کی عمر میں انتقال

روم… عالمی فیشن انڈسٹری کے عظیم ڈیزائنر اور ہالی ووڈ سٹارز کے پسندیدہ تخلیق کار جارجیو ارمانی 91 برس کی عمر میں وفات پا گئے۔ارمانی کے انتقال کی تصدیق ان کی کمپنی نے کی، جس نے بتایا کہ وہ کئی ماہ سے بیماری کا شکار تھے اور پہلی بار میلان فیشن ویک کے شو میں شرکت نہیں کر سکے۔ کمپنی اور خاندان نے عزم ظاہر کیا ہے کہ وہ ارمانی کے خواب کو جاری رکھتے ہوئے کمپنی کو ان کی یاد کے ساتھ آگے بڑھائیں گے۔ارمانی نے اٹلی کو فیشن کی دنیا میں منفرد پہچان دی اور ان کا برانڈ عالمی سطح پر مقبول ہوا۔ وہ اپنی کمپنی کے واحد مالک رہے اور 50 برس تک اسے آزادی کے ساتھ چلایا، جس سے کمپنی کی سالانہ آمدنی تقریبا 2.3 ارب یورو تک پہنچ گئی۔کنگ جارجیو کے نام سے مشہور ارمانی نے اپنے سادہ اور باوقار ڈیزائنز سے 1970 اور 1980 کی دہائی میں خواتین اور فیشن شائقین کو متاثر کیا۔ارمانی کے انتقال پر ہالی ووڈ سٹارز نے افسوس کا اظہار کیا۔ اداکارہ جولیا رابرٹس نے انسٹاگرام پر ارمانی کے ساتھ تصویر شیئر کرتے ہوئے لکھا، ایک سچا دوست، ایک لیجنڈ۔میلان میں ہفتہ اور اتوار کو ارمانی سے آخری دیدار کے لیے ہال کھولا جائے گا، جبکہ پیر کو ان کی آخری رسومات نجی طور پر ادا کی جائیں گی۔