ترکیہ کے ادارے ٹِکا کے تعاون سے پاکستان کی معروف فلاحی تنظیم الخدمت فاؤنڈیشن نے قدرتی آفات سے نمٹنے کے لیے دو روزہ تربیتی ورکشاپ کا انعقاد کیا۔ اس ورکشاپ میں ریسکیو 1122 کے ماہرین نے الخدمت فاؤنڈیشن کے رضا کاروں کو آگ، سیلاب، زلزلہ اور دیگر ہنگامی حالات سے نمٹنے کی تربیت دی۔ ورکشاپ کے اختتام پر مرکزی سیکرٹریٹ میں ایک خصوصی تقریب کا اہتمام کیا گیا، جس میں ترک قونصلر جنرل لاہور ڈاکٹر علی ارباش، ٹِکا اسلام آباد کے سربراہ محسن بالچی، الخدمت فاؤنڈیشن کے نائب صدر احسان اللہ وقاص، ترکش ائیر لائنز لاہور کے جی ایم عمر اوندر اور پاک ترک معارف اسکول کے ذمہ داران سمیت کئی اہم شخصیات نے شرکت کی۔
ڈاکٹر علی ارباش نے تقریب میں پاکستان کے ساتھ ترکیہ کے فلاحی تعاون کو مزید فروغ دینے کی اہمیت پر زور دیا۔ محسن بالچی نے اس بات کا ذکر کیا کہ ٹکا کی جانب سے الخدمت فاؤنڈیشن کو مختلف سرگرمیوں میں مکمل تعاون حاصل ہے۔ احسان اللہ وقاص نے کہا کہ اگرچہ تمام مسلم ممالک آپس میں بھائی ہیں، لیکن پاکستان اور ترکیہ کے تعلقات بھائیوں کی طرح زیادہ مضبوط اور گہرے ہیں۔ ورکشاپ میں شامل تمام شرکاء کو سرٹیفکیٹس دیے گئے، جبکہ تقریب کے آخر میں مہمانوں کو اعزازی شیلڈز سے نوازا گیا۔
