پاکستان کی ترکیہ میں دہشتگرد حملے کی مذمت، متاثرین سے دکھ کا اظہار

صدر پاکستان آصف علی زرداری کی انقرہ میں ہونے والے دہشت گردانہ حملے کی شدید مذمت کرتے ہوئے کہا ہے کہ پاکستان مشکل کی اس گھڑی میں ترک بھائیوں اور بہنوں کے ساتھ اظہار یکجہتی کرتا ہے۔ صدر مملکت کا کہنا تھا کہ بزدلانہ حملے میں جانیں گنوانے والوں کے خاندانوں کے ساتھ تعزیت کا اظہار کرتے ہیں، دہشت گردی ایک عالمی چیلنج ہے، پاکستان نے بھی دہشت گردی کا سامنا کیا۔ 
وزیر اعظم پاکستان شہباز شریف نے بھی دہشت گردی کے حملے کو افسوس ناک قرار دیا ہے۔
ترجمان دفتر خارجہ نے متاثرہ خاندانوں کے ساتھ دکھ کا اظہار کرتے ہوئے کہا زخمیوں کی جلد صحتیابی کے لیے دعاگو ہیں۔
روسی صدر ولادیمیر پیوٹن اور نیٹو کے سربراہ کی جانب سے بھی  ترکیہ میں دہشت گرد حملے کی مذمت کی گئی ہے۔