“پتوکی میں خسرہ سے بچوں کی ہلاکتوں پر مریم نواز شریف کا فوری ایکشن

وزیراعلیٰ پنجاب مریم نواز شریف نے پتوکی میں خسرہ سے بچوں کی ہلاکتوں کا نوٹس لیتے ہوئے سیکریٹری ہیلتھ سے فوری رپورٹ طلب کر لی ہے۔ انہوں نے وزرا اور محکمہ صحت کے حکام کو فوری طور پر پتوکی پہنچنے کی ہدایت کی ہے۔

وزیراعلیٰ مریم نواز شریف نے خسرہ کے مرض میں مبتلا بچوں کو بہترین علاج کی سہولت فراہم کرنے کی ہدایت دی ہے۔ انہوں نے کہا کہ محکمہ صحت کی کوتاہی اور نااہلی کی وجہ سے معصوم جانیں ضائع ہوئیں، اور اس کوتاہی کی ذمہ داری کا تعین کرکے قرار واقعی سزا دی جائے گی۔

انہوں نے ہسپتالوں میں خسرہ سمیت دیگر امراض کی ویکسینیشن یقینی بنانے کا حکم بھی دیا ہے، اور روزانہ کی بنیاد پر خسرہ سمیت دیگر وبائی امراض کے کیسز کی مانیٹرنگ کرنے کی ہدایت کی ہے۔ مریم نواز شریف نے یہ بھی یقین دہانی کرائی کہ متاثرہ بچوں کے علاج معالجہ میں کوئی غفلت نہیں کی جائے گی۔