سعودی عرب اور امارات کا خلیجی تعاون بڑھانے پراتفاق

ریاض (مانیٹرنگ ڈیسک) سعودی عرب اور متحدہ عرب امارات نے حوثی باغیوں کے حملوں کے تناظر میں خلیجی ممالک کے درمیان قریبی رابطوں اور مشترکہ تعاون کو فروغ دینے پر زور دیا ہے۔سعودی وزیر خارجہ شہزادہ فیصل بن فرحان اور اماراتی وزیر خارجہ شیخ عبداللہ بن زاید آل نہیان کے درمیان ٹیلی فونک گفتگو ہوئی، جس میں سعودی عرب کی شہری تنصیبات پر حوثی حملوں کی مذمت کی گئی۔دونوں وزرائے خارجہ نے علاقائی کشیدگی میں کمی لانے اور تنازعات کو مزید پھیلنے سے روکنے کے لیے مشترکہ سفارتی کوششیں تیز کرنے کی ضرورت پر زور دیا۔اس سے قبل خلیج تعاون کونسل (جی سی سی) کے وزرائے خارجہ بھی سعودی عرب پر حملوں کی مذمت کرتے ہوئے مملکت کے ساتھ یکجہتی اور مشترکہ دفاعی معاہدے کے حوالے سے اپنے عزم کا اعادہ کر چکے ہیں۔دوسری جانب سعودی عرب اور ترکیہ کے وزرائے خارجہ نے بھی علاقائی سلامتی اور استحکام کے لیے باہمی تعاون بڑھانے پر تبادلہ خیال کیا۔یہ سفارتی سرگرمیاں ایسے وقت میں سامنے آئی ہیں جب حوثی حملوں میں سعودی ہوائی اڈوں، توانائی کے بنیادی ڈھانچے اور شہری علاقوں کو نشانہ بنائے جانے کے بعد خطے میں سکیورٹی خدشات میں اضافہ ہوا ہے۔