قومی ایوی ایشن اکیڈمی میں ’’یومِ فراغت‘‘ کی تقریب منعقد
باکو( ترکیہ خبر)آذربائیجان کی قومی ایوی ایشن اکیڈمی میں ’’یومِ فراغت‘‘ کے موقع پر ایک پروقار تقریب کا انعقاد کیا گیا، جس میں طلبہ، اساتذہ اور مختلف شعبہ ہائے زندگی سے تعلق رکھنے والی شخصیات نے شرکت کی۔تقریب کا آغاز آذربائیجان کے قومی ترانے سے کیا گیا، جبکہ ملک کی خودمختاری اور علاقائی سالمیت کے لیے جانوں کا نذرانہ پیش کرنے والے شہدا کو ایک منٹ کی خاموشی اختیار کر کے خراجِ عقیدت پیش کیا گیا۔اس موقع پر قومی ایوی ایشن اکیڈمی کے ریکٹر اور ممتاز ماہرِ تعلیم عارف پاشایف کا تہنیتی پیغام شرکا کو سنایا گیا، جسے اکیڈمی کی معاشی و سماجی امور کی نائب ریکٹر گلنار احمدوا نے پڑھ کر سنایا۔تقریب سے خطاب کرتے ہوئے آذربائیجان کے نائب وزیر برائے ڈیجیٹل ترقی و ٹرانسپورٹ، ایلمین محمدوف نے ملک میں شہری ہوا بازی کے شعبے کی ترقی، ٹرانسپورٹ کے بنیادی ڈھانچے کی جدیدکاری اور ہوابازی کی تعلیم کے فروغ کے لیے جاری منصوبوں پر روشنی ڈالی۔انہوں نے کہا کہ انسانی وسائل کی ترقی اور جدید ہوابازی کی تعلیم کو فروغ دینا ریاستی پالیسی کی اہم ترجیحات میں شامل ہے۔