لیبیا میں ترکیہ سے سمندری معاہدے کی منظوری کا خیرمقدم، بحیرۂ روم میں تعاون بڑھانے پر زور
استنبول( تر کیہ خبر) لیبیا کے مشرقی اور مغربی دھڑوں کے سیاسی رہنماؤں اور اداروں نے ترکیہ کے ساتھ سمندری معاہدے کی پارلیمانی منظوری کا خیرمقدم کرتے ہوئے اسے دوطرفہ تعلقات مضبوط بنانے اور بحیرۂ روم میں ملکی مفادات کے تحفظ کی جانب اہم پیش رفت قرار دیا ہے۔لیبیا کے مشرقی علاقے میں قائم ایوانِ نمائندگان نے متفقہ رائے سے ۲۰۱۹ء کے سمندری حدود کے معاہدے کی منظوری دی، جس کے ذریعے سابقہ مخالفت واپس لے لی گئی۔ طرابلس میں قائم قومی اتحاد حکومت کی وزارتِ خارجہ نے اس فیصلے کو ترکیہ کے ساتھ تعاون بڑھانے اور علاقائی استحکام کے لیے مثبت قدم قرار دیا۔لیبیا کی اعلیٰ ریاستی کونسل نے بھی فیصلے کا خیرمقدم کرتے ہوئے ملکی خودمختاری اور قومی مفادات کے تحفظ کے لیے مشترکہ حکمتِ عملی اپنانے پر زور دیا۔ کونسل نے قانونی کارروائی مکمل کرنے اور متعلقہ قومی اداروں کے درمیان رابطہ مضبوط بنانے کا مطالبہ کیا۔