شوشا میں ترک ریاستوں کے مذہبی اداروں کا مشترکہ اعلامیہ جاری

 باکو( ترکیہ خبر)آذربائیجان کے شہر شوشا میں ترک ریاستوں کی تنظیم کے رکن ممالک کے مذہبی امور سے متعلق سرکاری اداروں کے سربراہان کا پہلا اجلاس اختتام پذیر ہوگیا، جس کے اختتام پر 11 نکاتی مشترکہ اعلامیے پر دستخط کیے گئے۔اعلامیے میں رکن ممالک کے درمیان مذہبی امور میں ادارہ جاتی تعاون، مشترکہ سرگرمیوں کے فروغ اور مستقبل کے لائحہ عمل کو شامل کیا گیا ہے۔دستاویز میں سیکولر اصولوں کی بنیاد پر ریاست اور مذہب کے تعلقات کو مضبوط بنانے، مذہبی شعبے میں تجربات کے تبادلے اور دینی تعلیم کے میدان میں تعاون کو فروغ دینے پر زور دیا گیا ہے۔اعلامیے میں نوجوانوں کی قومی اور اخلاقی اقدار کے مطابق تربیت، خاندانی نظام کے استحکام میں خواتین کے کردار کو بڑھانے اور ڈیجیٹل معلوماتی ماحول میں مذہبی آگاہی کو فروغ دینے سے متعلق نکات بھی شامل ہیں۔اس کے علاوہ آذربائیجان کے آزاد کرائے گئے علاقوں میں تاریخی، مذہبی اور ثقافتی ورثے کی بحالی کے لیے حمایت کے عزم کا اظہار کیا گیا، جبکہ ترک دنیا میں بین المذاہب ہم آہنگی، اسلامی یکجہتی اور ترک اسلامی ثقافتی ورثے کے عالمی سطح پر فروغ کی اہمیت پر بھی زور دیا گیا۔اعلامیے میں مذہبی انتہا پسندی، شدت پسندی، دہشت گردی، اسلاموفوبیا اور دیگر منفی رجحانات کے خلاف مشترکہ کوششوں کو مزید مضبوط بنانے کی ضرورت کو بھی اجاگر کیا گیا۔