منسک میں ’’عظیم فتح کے وارث‘‘ کتاب کی تقریب رونمائی

کیف( تر کیہ خبر) منسک میں بیلاروس کے عظیم محبِ وطن جنگ کی تاریخ کے سرکاری عجائب گھر میں ’’عظیم فتح کے وارث‘‘ نامی کتاب کی تقریب رونمائی ہوئی۔کتاب کے مصنف اور صحافتی تنظیم ’’دیاسپورا سرگرمیوں کی صحافتی معاونت‘‘ کے سربراہ فواد حسین زادہ ہیں۔ تقریب بیلاروس میں آذربائیجان کے سفارت خانے اور بیلاروس آذربائیجان برادریوں کی کانگریس کے تعاون سے منعقد کی گئی۔تقریب میں بیلاروس میں آذربائیجان کے فوجی اتاشی کرنل ایڈین رحیموف، عجائب گھر کی انتظامیہ، تارکینِ وطن کی تنظیموں، بیلاروس کی پارلیمنٹ کے ارکان اور ذرائع ابلاغ کے نمائندوں نے شرکت کی۔مہمانوں نے پہلے عجائب گھر کا دورہ کیا، جس کے بعد عجائب گھر کی ڈائریکٹر رِمّا رُملہ نے فتح ہال میں شرکا سے ملاقات کی۔ اس موقع پر فواد حسین زادہ نے عجائب گھر کے کتب خانے کے لیے کتاب اور ایک تعریفی سند پیش کی۔مصنف نے کتاب کو اس عجائب گھر کے لیے پیش کرنے پر خوشی کا اظہار کیا، جہاں آذربائیجان کی قیادت کے اہم رہنما بھی دورہ کر چکے ہیں۔ انہوں نے یاد دلایا کہ سابق سوویت رہنما حیدر علی یف نے دسمبر 1978ء میں جبکہ صدر الہام علی یف نے 2015ء میں بیلاروس کے سرکاری دوروں کے دوران عجائب گھر کا دورہ کیا اور معزز مہمانوں کی کتاب میں اپنے تاثرات درج کیے تھے۔