آذربائیجان اور عالمی بینک میں زرعی شعبے کے تعاون کو وسعت دینے پر اتفاق

آذربائیجان اور عالمی بینک میں زرعی شعبے کے تعاون کو وسعت دینے پر اتفاق

 باکو (ترکیہ خبر) آذربائیجان کے وزیر زراعت مجنون محمدوف نے عالمی بینک کی یورپ اور وسطی ایشیا سے متعلق نائب صدر انٹونیلا باسانی سے ملاقات کی، جس میں زرعی شعبے میں دوطرفہ تعاون بڑھانے اور مختلف ترقیاتی منصوبوں پر تبادلہ خیال کیا گیا۔آذربائیجان کی سرکاری خبر رساں ایجنسی کے مطابق ملاقات عالمی بینک کے واشنگٹن میں واقع مرکزی دفتر میں ہوئی، جہاں آذربائیجان اور عالمی بینک کے درمیان زراعت کے شعبے میں شراکت داری کو مزید مستحکم بنانے کے امور زیر بحث آئے۔ اس موقع پر پائیدار اور مسابقتی زرعی ترقی کے فروغ اور آبپاشی کے نظام کو جدید بنانے کے لیے تیار کیے جانے والے مجوزہ منصوبے پر بھی تبادلہ خیال کیا گیا۔وزیر زراعت مجنون محمدوف نے کہا کہ زرعی شعبے کی ترقی آذربائیجان حکومت کی اہم تزویراتی ترجیحات میں شامل ہے۔ انہوں نے عالمی بینک کے ساتھ ماضی میں مختلف منصوبوں کے تحت قائم ہونے والے کامیاب تعاون کا حوالہ دیتے ہوئے مشترکہ سرگرمیوں کو مزید وسعت دینے میں دلچسپی ظاہر کی۔انہوں نے مزید کہا کہ صدر الہام علییف کے 25 مئی 2026 کے حکم نامے سے منظور ہونے والے 2026 سے 2030 تک کے ریاستی پروگرام کے تحت زراعت، ماہی گیری اور آبی زراعت سے حاصل ہونے والی مصنوعات کی پیداوار اور پراسیسنگ کے شعبوں میں ترقی کے لیے عالمی بینک کے ساتھ تعاون کو مزید آگے بڑھانے کے خواہاں ہیں۔


© 2026 ترکیہ خبر. تمام حقوق محفوظ ہیں. ٹوگیدر میڈیا کی پیشکش.