سانحہ 9 مئی کے اہم مقدمات کی سماعت 3 ستمبر تک ملتوی، شیخ رشید عدالت میں پیش

راولپنڈی…سانحہ 9 مئی کے اہم مقدمات، جن میں جی ایچ کیو حملہ کیس سمیت 12 مقدمات شامل ہیں، کی سماعت انسدادِ دہشت گردی کی عدالت میں ہوئی تاہم ملزمان کی حاضری کم ہونے کے باعث کارروائی آگے نہ بڑھ سکی اور سماعت 3 ستمبر تک ملتوی کردی گئی۔مقدمات کی سماعت جیل ٹرائل کے بجائے ضلع کچہری میں انسدادِ دہشت گردی عدالت کے جج امجد علی شاہ نے کی۔ ان کیسز میں جی ایچ کیو کے گیٹ نمبر 4 اور آرمی میوزیم پر حملے کے علاوہ صدر میں حساس ادارے کی عمارت، میٹرو بس اسٹیشن اور دیگر حساس دفاتر پر حملے کے واقعات شامل ہیں۔جی ایچ کیو حملہ کیس میں مجموعی طور پر 119 گواہ نامزد ہیں جن میں سے اب تک 27 گواہوں کے بیانات ریکارڈ کیے جا چکے ہیں۔ آج مزید 3 گواہوں کو طلب کیا گیا تھا جبکہ سابق وزیر داخلہ شیخ رشید احمد، صداقت عباسی، واثق قیوم اور کرنل اجمل صابر بھی اس کیس میں پیش ہونا تھا۔کارروائی کے دوران سانحہ 9 مئی سے متعلق 11 دیگر مقدمات میں چالان کی نقول ملزمان کو فراہم کرنے کا عمل مکمل کر لیا گیا۔شیخ رشید احمد نے عدالت میں حاضری لگوائی اور بعد ازاں واپس روانہ ہوگئے۔ سماعت کے موقع پر پراسیکیوٹر ظہیر شاہ اور وکلائے صفائی ملک فیصل اور حسنین سنبل بھی عدالت میں موجود تھے، تاہم کم تعداد میں ملزمان پیش ہوئے جس پر عدالت نے کارروائی مخر کرتے ہوئے آئندہ تاریخ 3 ستمبر مقرر کر دی۔