بائیکار کا اہم اعلان: “بائراکتار کِزِل ایلما” کی پہلی سیریل ترسیل اسی سال شروع کرنے کا ہدف

استنبول( مانیٹرنگ ڈیسک) ترکیہ کی دفاعی کمپنی بائیکار نے اعلان کیا ہے کہ وہ اپنے جدید بغیر پائلٹ جنگی طیارے “بائراکتار کِزِل ایلما” کی پہلی سیریل ترسیل رواں سال شروع کرنے کا ارادہ رکھتی ہے۔SAHA 2026 بین الاقوامی دفاعی و ایرو اسپیس نمائش کے موقع پر انادولو کے ٹیکنالوجی ڈیسک سے گفتگو کرتے ہوئے بائیکار کے سی ای او ہالوک بایراکتار نے بتایا کہ کِزِل ایلما اس وقت مسلسل فلائٹ ٹیسٹنگ کے مرحلے سے گزر رہا ہے اور کمپنی جلد اسے بڑے پیمانے پر پیداوار میں لانے کی طرف بڑھ رہی ہے۔انہوں نے کہا کہ “ہم اسی سال پہلی سیریل ترسیلات مکمل کرنے کا ہدف رکھتے ہیں۔”ہالوک بایراکتار نے مزید کہا کہ ترکیہ کی دفاعی صنعت گزشتہ دو دہائیوں میں ایک بڑی تبدیلی سے گزری ہے۔ ان کے مطابق 2002 میں ملک میں دفاعی صنعت سے وابستہ کمپنیوں کی تعداد تقریباً 20 تھی، جبکہ 2026 میں یہ تعداد 3000 سے زائد ہو چکی ہے۔انہوں نے بتایا کہ ترکیہ کی دفاعی برآمدات 250 ملین ڈالر سے بڑھ کر گزشتہ سال 10 ارب ڈالر سے تجاوز کر گئی ہیں اور رواں سال اس کا ہدف 13 ارب ڈالر رکھا گیا ہے۔ان کے مطابق SAHA استنبول اب یورپ کا سب سے بڑا صنعتی کلسٹر بن چکا ہے، جس کے 1300 سے زائد ارکان ہیں اور اس میں 30 سے زیادہ جامعات بھی شامل ہیں۔