علییف اور مرزیویف کا تاشقند میں نظامی گنجوی جامعہ کا افتتاح

باکو( تر کیہ خبر) آذربائیجان کے صدر الہام علییف اور ازبکستان کے صدر شوکت مرزیویف نے تاشقند میں نظامی گنجوی کے نام سے منسوب قومی تدریسی جامعہ کی افتتاحی تقریب میں شرکت کی۔دونوں صدور نے فیتہ کاٹ کر تعلیمی ادارے کا افتتاح کیا اور جامعہ کے صحن میں مشترکہ طور پر ایک پودا بھی لگایا۔ انہیں ادارے کی تاریخ اور وہاں دستیاب تعلیمی سہولیات کے بارے میں بریفنگ دی گئی۔جامعہ کی بنیاد 1935ء میں وسطی ایشیائی ریاستی جامعہ کے شعبہ تعلیم کی بنیاد پر تاشقند تدریسی ادارے کے طور پر رکھی گئی تھی۔ 1947ء میں اسے نظامی کے نام سے منسوب کیا گیا، جبکہ 1998ء سے یہ تاشقند ریاستی تدریسی جامعہ کے طور پر کام کر رہا ہے۔جامعہ کے فارغ التحصیل افراد میں ازبکستان کے ادب، ثقافت، سائنس اور عوامی زندگی میں نمایاں خدمات انجام دینے والی متعدد شخصیات شامل ہیں۔