روس کا کیف پر سب سے بڑا فضائی حملہ، 4 ہلاک اور درجنوں زخمی

کیف…روس نے یوکرین پر اب تک کا سب سے بڑا فضائی حملہ کیا، جس کے نتیجے میں 4 افراد ہلاک اور درجنوں زخمی ہو گئے۔ دارالحکومت کیف میں سرکاری دفاتر آگ کی لپیٹ میں آ گئے۔یوکرینی حکام کے مطابق حملے میں ڈرون اور میزائل استعمال کیے گئے، جن سے کئی بلند عمارتیں متاثر ہوئیں۔ یہ پہلا موقع ہے کہ یوکرین کی کابینہ کے دفاتر پر براہ راست حملہ ہوا۔یوکرینی فضائیہ کے مطابق ایک ہی رات میں روس نے 810 ڈرون اور 13 میزائل داغے، جو اب تک کا نیا ریکارڈ ہے۔ حملوں میں ایک حاملہ خاتون زخمی ہوئیں اور قبل از وقت بچے کو جنم دینا پڑا، جبکہ ایک گھڑ سواری کلب میں سات گھوڑے بھی ہلاک ہوئے۔یوکرینی صدر ولادیمیر زیلنسکی نے کہا کہ یہ حملے جنگ کو طول دینے کی کوشش ہیں۔ فرانس کے صدر ایمانوئل میکرون اور برطانیہ کے وزیراعظم کیئر اسٹارمر نے روسی حملوں کی مذمت کی، جبکہ یورپی یونین نے کریملن پر سفارت کاری کو سبوتاژ کرنے کا الزام عائد کیا۔ امریکی صدر ڈونلڈ ٹرمپ نے روس پر مزید پابندیاں عائد کرنے کی تیاری کا اعلان کیا۔روس اس وقت یوکرین کے تقریبا 20 فیصد حصے پر قابض ہے، اور جنگ میں اب تک ہزاروں افراد ہلاک اور لاکھوں بے گھر ہو چکے ہیں۔