بھارت نے آذربائیجان کو شنگھائی تعاون تنظیم کی رکنیت سے روک دیا

آذربائیجان…بھارت نے ایک بار پھر آذربائیجان کو شنگھائی تعاون تنظیم (ایس سی او) کا مکمل رکن بننے سے روک دیا۔ روسی میڈیا کے مطابق آذربائیجان کے ذرائع ابلاغ کا کہنا ہے کہ بھارت نے آذربائیجان کی رکنیت کی راہ میں رکاوٹ ڈالی ہے۔رپورٹس کے مطابق آذربائیجان کے صدر الہام علییوف نے چین کے شہر تیانجن میں وزیراعظم شہباز شریف سے ملاقات کے دوران یہ معاملہ اٹھایا۔ ان کا کہنا تھا کہ پاکستان کے ساتھ تعاون پر بھارت عالمی سطح پر آذربائیجان کے خلاف انتقامی رویہ اختیار کر رہا ہے۔صدر علییوف نے پاکستان کو بھارت کے خلاف کامیابی پر مبارکباد بھی دی اور کہا کہ آذربائیجان اور پاکستان کے برادرانہ تعلقات ہیں جنہیں بھارت پسند نہیں کرتا۔یاد رہے کہ شنگھائی تعاون تنظیم 2001 میں قائم ہوئی تھی جس کے رکن ممالک میں پاکستان، بھارت، ایران، قازقستان، چین، کرغزستان، روس، تاجکستان اور ازبکستان شامل ہیں جبکہ بیلاروس جولائی 2024 میں تنظیم کا مکمل رکن بن چکا ہے۔ آذربائیجان فی الحال ڈائیلاگ پارٹنر ہے۔