یورپی یونین نے روسی گیس کی درآمدات پر مکمل پابندی کا اعلان

ترکی( کامرس ڈیسک)یورپی یونین کے ستا ئیس رکن ممالک نے باضابطہ طور پر روسی پائپ لائن گیس اور مائع قدرتی گیس (ایل این جی) کی درآمدات ختم کرنے کے لیے ایک نیا ضابطہ اختیار کر لیا ہے۔یورپی کونسل کے بریفنگ کے مطابق، نئے قوانین کے تحت توانائی کی سپلائی کی نگرانی مضبوط ہوگی اور توانائی کے متنوع ذرائع کو تیز کرنے کے اقدامات بھی کیے جائیں گے۔ یہ اقدام یورپی یونین کے REPowerEU منصوبے کے تحت روسی توانائی پر انحصار ختم کرنے کی طرف ایک بڑا قدم ہے۔ضابطے کے مطابق روسی پائپ لائن گیس اور ایل این جی کی درآمدات ممنوع ہوں گی۔ پابندی چھ ہفتے بعد نافذ العمل ہوگی، جبکہ موجودہ معاہدے عبوری مدت کے تحت رہیں گے۔ ایل این جی کی مکمل پابندی 2027 کے آغاز سے، اور پائپ لائن گیس کی مکمل پابندی 2027 کے خزاں میں نافذ ہوگی۔گیس کی درآمدات کی اجازت دینے سے پہلے، رکن ممالک کو ماخذ ملک کی تصدیق کرنا لازمی ہوگی۔ نئے قوانین کی خلاف ورزی پر افراد پر کم از کم 2.5 ملین یورو اور کمپنیوں پر کم از کم 40 ملین یورو جرمانہ یا کمپنی کے عالمی سالانہ کاروبار کا 3.5 فیصد یا لین دین کے تخمینی حجم کا 300 فیصد جرمانہ عائد ہو سکتا ہے۔1 مارچ 2026 تک رکن ممالک کو قومی منصوبے تیار کرنے ہوں گے جن میں یہ بیان کیا جائے گا کہ وہ روسی گیس کی جگہ کس طرح متنوع ذرائع استعمال کریں گے اور ممکنہ چیلنجز کا مقابلہ کیسے کریں گے۔ اس دوران کمپنیوں کو باقی روسی گیس کے معاہدوں کی اطلاع قومی حکام اور یورپی کمیشن کو دینا ہوگی۔ وہ رکن ممالک جو روسی تیل کی درآمد جاری رکھیں گے، انہیں بھی متنوع منصوبے جمع کرانے ہوں گے۔